लोहारा तालुक्यात ‘मतांचा डाव’ रंगला… आता सत्तेची चाल कुणाची ?

लोहारा जि. धाराशिव (विक्रांत संगशेट्टी) :  जिल्हा परिषद व पंचायत समिती सार्वत्रिक निवडणूक २०२६ अंतर्गत दि. ७ फेब्रुवारी रोजी लोहारा तालुक्यात मतदानाचा थरार अनुभवायला मिळाला. सकाळी शांततेत सुरू झालेला मतदानाचा खेळ दुपारनंतर चांगलाच तापला आणि सायंकाळी आकड्यांनी सगळ्यांनाच विचारात टाकले. अखेर तालुक्याची मतदान टक्केवारी थांबली ५७.३६ टक्क्यांवर!

🔴 सकाळी शांतता, दुपारी हालचाल
पहिल्या काही तासांत मतदानाचा वेग मंद होता. मात्र “एक मत सत्तेचा ताळा बदलू शकते” या जाणिवेने दुपारनंतर मतदार केंद्रांकडे धाव घेतली. गावागावांत राजकीय चर्चा रंगल्या आणि शेवटच्या तासात मतदान केंद्रांवर चांगलीच गर्दी दिसून आली.

🔥 माकणी–धानुरी गट ठरला निर्णायक!
संपूर्ण तालुक्यात सर्वाधिक मतदान माकणी–धानुरी गटात ६३.६२ टक्के झाले. येथील आकडे पाहता हा गट निकालाच्या दृष्टीने ‘गेमचेंजर’ ठरण्याची शक्यता वर्तवली जात आहे.

⚖️ कानेगाव– भातागळी गटात तोलामोलाचा संघर्ष
या गटात ५८.३४ टक्के मतदान झाले. कोणत्या चिन्हावर मतांचा कौल झुकला, याबाबत तर्कवितर्कांना उधाण आले आहे.

❄️ जेवळी–अचलेर गटात कमी मतदान, वाढली राजकीय गणिते
तालुक्यात सर्वात कमी मतदान जेवळी–अचलेर गटात (५२.९० टक्के) झाले. कमी मतदानाचा फायदा नेमका कुणाला होणार, यावरून राजकीय वर्तुळात चर्चा रंगत आहेत.

📊 आकड्यांचा थरार
एकूण मतदार : ८९,३८५
मतदान केलेले मतदार : ५१,२७४
पुरुष मतदार : २७,२५२
महिला मतदार : २४,०२२

👮 शांत मतदान, पण उत्सुकता टोकाला
तालुक्यात कुठेही मोठा अनुचित प्रकार न घडता मतदान प्रक्रिया शांततेत पार पडली. मात्र शांततेआड दडलेला राजकीय थरार आता निकालापर्यंत कायम राहणार आहे.

⏳ निकालाच्या दिवशीच उलगडणार ‘मतांचा डाव’
तोपर्यंत लोहारा तालुक्यातील प्रत्येक गावात, प्रत्येक चौकात एकच प्रश्न घुमतोय —
“सत्तेची चाल अखेर कुणाच्या बाजूने?”