एका वाढदिवसाने बदललेला दृष्टिकोन — मराठी शाळेतील प्रेरणेचा झरा

लोहारा : (जि.धाराशिव) शिक्षण म्हणजे केवळ वर्गातील धडे नव्हेत, तर विद्यार्थ्यांच्या जीवनात सकारात्मक दृष्टिकोन रुजवण्याची प्रक्रिया आहे, हे जिल्हा परिषद प्राथमिक शाळा मार्डी येथे साजऱ्या झालेल्या एका अनोख्या वाढदिवसातून अधोरेखित झाले. दि. 13 जानेवारी 2026 रोजी शाळेतील उपक्रमशील शिक्षिका श्रीमती चौधरी वर्षा कमलाकर यांनी आपला वाढदिवस पारंपरिक पद्धतीने न साजरा करता तो विद्यार्थ्यांच्या आरोग्य, सवयी आणि मूल्यनिर्मितीस अर्पण करून सर्वांसाठी प्रेरणादायी आदर्श निर्माण केला.

ग्रामीण भागातील शाळांमध्ये आरोग्यविषयक जागरूकता निर्माण होणे ही काळाची गरज ओळखून चौधरी मॅडम यांनी वाढदिवसाच्या निमित्ताने पहिली ते सातवीच्या सर्व विद्यार्थ्यांना पिण्याच्या पाण्याच्या बॉटल्सचे वाटप केले. या उपक्रमामुळे विद्यार्थ्यांमध्ये स्वच्छतेच्या सवयी, नियमित पाणी पिण्याचे महत्त्व आणि पर्यावरणपूरक विचार रुजवण्याचा संदेश मिळाला.

या कार्यक्रमास शाळेचे मुख्याध्यापक श्री सुरेश वाघमोडे, शालेय व्यवस्थापन समितीचे अध्यक्ष श्री नूर मोहसीन पठाण, मार्डी गावचे माजी सरपंच श्री श्रीमंत अशोकराव पाटील, शिक्षणतज्ञ श्री योगेश मारुती देवकर, मार्डी गावचे ग्रामसेवक श्री अंकुश गाडेकर, शिक्षकवृंद, पालक व ग्रामस्थ उपस्थित होते. 

यावेळी ग्रामसेवक श्री अंकुश गाडेकर यांच्या हस्ते विद्यार्थ्यांना पाण्याच्या बॉटल्सचे वाटप करण्यात आले. ग्रामपातळीवरून शिक्षण व आरोग्य विषयक उपक्रमांना सातत्याने पाठबळ देणारे नेतृत्व म्हणून त्यांनी शाळेतील या उपक्रमाचे कौतुक करत, “शाळेतून घडणारे असे संस्कारच उद्याच्या सक्षम गावाची पायाभरणी करतात,” असे प्रेरणादायी मत व्यक्त केले.

यावेळी बोलताना श्रीमती चौधरी मॅडम म्हणाल्या, “वाढदिवस हा स्वतःपुरता मर्यादित न ठेवता विद्यार्थ्यांच्या आयुष्यात काहीतरी चांगले जोडणारा असावा. निरोगी आणि सुसंस्कृत विद्यार्थी घडले, तरच शिक्षणाचे खरे सार्थक होईल.”
शालेय व्यवस्थापन समितीचे अध्यक्ष श्री नूर मोहसीन पठाण यांनी या उपक्रमाचे मुक्तकंठाने कौतुक करत,
“चौधरी मॅडम यांच्या कृतीतून शिक्षकाची सामाजिक जबाबदारी स्पष्ट होते. असा आदर्श इतर शाळांनीही घ्यावा,” असे मत व्यक्त केले.

माजी सरपंच श्री श्रीमंत अशोकराव पाटील यांनीही थोडक्यात प्रतिक्रिया देत, “वैयक्तिक आनंद समाजहितासाठी वापरणे ही आजच्या काळात प्रेरणादायी भूमिका आहे,” असे सांगितले.

कार्यक्रमानंतर शाळेतील वातावरण समाधानाने भरलेले दिसून आले. विद्यार्थ्यांच्या चेहऱ्यावरील आनंद, पालकांचा वाढलेला विश्वास आणि शिक्षकांचा अभिमान यामुळे हा उपक्रम केवळ एका दिवसापुरता न राहता संपूर्ण जिल्ह्यासाठी प्रेरणादायी ठरणारा संदेश देऊन गेला.

या उपक्रमामुळे शिक्षक, पालक आणि विद्यार्थ्यांनी समाधान व्यक्त केले. मार्डी शाळेतून उमटलेली ही प्रेरणा आजच्या काळात शिक्षक, शाळा आणि समाज यांच्यातील नातेसंबंध अधिक दृढ करणारी ठरली आहे.