योगासन स्पर्धेत अवघे शिक्षक थक्क… शेवटी विजेत्यांची नावं ऐकून टाळ्यांचा गडगडाट !

लोहारा | 16 नोव्हेंबर 2025

आज सकाळी अगदी ८.३० वाजताच गट शिक्षण कार्यालय, पंचायत समिती लोहारा परिसरात काहीतरी वेगळंच वातावरण जाणवत होतं. शिक्षक, शिक्षिका, अधिकारी, कर्मचारी — सर्वजण एका ठिकाणी, पण उत्सुकता मात्र प्रत्येकाच्या नजरेत! कारण होता तालुकास्तरीय योगासन स्पर्धेचा थरार!

शांततेसोबतच एक आगळावेगळा स्पोर्ट्स फिल… मायक्रोफोनचा हलकासा आवाज, आसन करण्यासाठी तयार झालेली प्रत्येक स्पर्धकांची देहबोली आणि कोण जिंकणार याची भिरभिरणारी उत्कंठा. नियमही कठोर — पाच योगासने ‘परफेक्ट’ करणे अनिवार्य… थोडी चूक झाली तरी गुण कपात!

स्पर्धा सुरु होताच शरीराची लवचिकता, संतुलन, श्वास नियंत्रण आणि मानसिक एकाग्रता याची खरी परीक्षा पाहायला मिळाली. आणि मग सुरुवात झाली गुणांकनाची… प्रत्येकाच्या चेहऱ्यावर धडधडत्या काळजाचा ठोका — नाव कोणाचं? विजेता कोण?

पहिलं नाव उच्चारलं गेलं आणि टाळ्यांचा गडगडाट पसरला —
स्त्री गट 46-50 मधील कास्ती केंद्रातील आदर्श शिक्षिका सौ. वर्षा कमलाकर चौधरी (जि.प. प्रा. शाळा मार्डी) यांनी जबरदस्त सादरीकरण करत पहिला क्रमांक पटकावला!

यानंतर सगळ्यांची नजर पुरुष गटाकडे… न्यायाधीशांच्या हातात निकालाचा कागद… क्षणभर शांतता… आणि मग घोषणा —
पुरुष गट 46-50 मधील कास्ती केंद्रातील उपक्रमशील शिक्षक मच्छिंद्र विठोबा बोकडे (जि.प. प्रा. शाळा कानेगाव) यांनी पहिला क्रमांक जिंकला!

यशाची घोषणा होताच दोन्ही विजेत्यांचे अभिनंदन करण्यासाठी विस्तार अधिकारी चंदनशिवे,  मोहन शेवाळे स्वतः पुढे आले आणि दोन्ही विजेत्यांचा जिल्हास्तरीय स्पर्धेसाठी निवडीचा अभिमानास्पद क्षण सर्वांनी उत्साहात अनुभवला!

शेवटी वातावरणात एकच भाव —
“लोहाराला आणखी एक यशाची सलामी!”

आता सगळ्यांच्या मनात एकच प्रश्न —
जिल्हास्तरावरही हे दोघे गुणगौरवाची पताका फडकवणार का?
उत्तराची वाट आता सर्वत्र उत्सुकतेने पाहिली जाते आहे…