लोहारा (प्रतिनिधी) – लोहारा तालुक्यातील जिल्हा परिषद प्राथमिक शाळा एकोंडी लो येथे दिवाळी निमित्त आकाशदिवा बनविण्याची कार्यशाळा घेण्यात आली. इयत्ता पहिली ते सातवीतील सर्व विद्यार्थ्यांनी या कार्यशाळेत उत्साहाने सहभाग घेत सुंदर-सुंदर आकाशदिवे तयार केले.
या प्रसंगी ग्रामपंचायत सरपंच सौ. सुलक्षणाताई सूर्यवंशी, उपसरपंच श्री. विकास भैय्या पाटील तसेच ग्रामविकास अधिकारी श्री. महादेव जगताप यांच्या हस्ते शाळेतील सर्व विद्यार्थ्यांना ‘दिवाळी अभ्यास पुस्तिका’ वाटप करण्यात आले. या पुस्तिका शिक्षक प्रदीपकुमार गुडले, सहशिक्षिका श्रीमती येदले मॅडम आणि श्रीमती मलकलपट्टे मॅडम यांनी विद्यार्थ्यांसाठी तयार केल्या आहेत.
मान्यवरांनी विद्यार्थ्यांनी तयार केलेल्या आकाशदिवांची पाहणी करून प्रथम, द्वितीय, तृतीय आणि उत्तेजनार्थ क्रमांक जाहीर केले. या विद्यार्थ्यांना ग्रामपंचायत कार्यालयाच्या वतीने पारितोषिके देण्यात येणार असल्याची माहिती श्री. महादेव जगताप यांनी दिली.
कार्यक्रमाच्या शेवटी उपस्थित मान्यवरांनी शाळेत सुरू असलेल्या विविध उपक्रमांचे आणि विद्यार्थ्यांमध्ये झालेल्या प्रगतीचे कौतुक केले. शाळेचे मुख्याध्यापक श्री. देवेंद्र आयलाने सर व सर्व शिक्षकांचे अभिनंदन करत शाळेचा वाढता नावलौकिक पाहून समाधान व्यक्त केले.
error: Content is protected !!
