कानेगाव येथे तेरणा ट्रस्टच्या आरोग्य शिबिरात २२५ हून अधिक रुग्णांची तपासणी व उपचार

प्रतिनिधी : इकबाल मुल्ला, लोहारा

राज्याचे लाडके मुख्यमंत्री देवेंद्र फडणवीस यांच्या वाढदिवसानिमित्त तेरणा ट्रस्टच्या माध्यमातून जिल्हाभरात आयोजित आरोग्य शिबिर मालिकेअंतर्गत लोहारा तालुक्यातील कानेगाव येथे रविवारी (दि. ५ ऑक्टोबर २०२५) भव्य मोफत आरोग्य तपासणी व उपचार शिबिर घेण्यात आले. या शिबिराला ग्रामस्थांचा उत्स्फूर्त प्रतिसाद मिळाला असून २२७ हून अधिक नागरिकांनी शिबिराचा लाभ घेतला.

हे शिबिर तेरणा पब्लिक चॅरिटेबल ट्रस्ट संचलित तेरणा स्पेशालिटी हॉस्पिटल अँड रिसर्च सेंटर, नेरुळ (नवी मुंबई) यांच्या वतीने आयोजित करण्यात आले होते. शिबिराचे उद्घाटन भाजप लोहारा तालुकाध्यक्ष राजेंद्र पाटील यांच्या हस्ते करण्यात आले. या वेळी सरपंच नामदेव लोभे, पीआरओ विनोद ओव्हाळ, जिल्हा चिटणीस शिवशंकर हत्तरगे, तालुका सरचिटणीस इकबाल मुल्ला, उपाध्यक्ष राजेंद्र कदम, तालुका चिटणीस संजय कदम, बालाजी चव्हाण, शिक्षक सेल तालुकाध्यक्ष दत्ता जावळे पाटील, निकेश बचाटे, सुयेशकुमार दंडगुले, एससी मोर्चा तालुकाध्यक्ष रोहित सिरसाठ आदी मान्यवर उपस्थित होते.

या शिबिरात मुंबईहून आलेल्या तज्ज्ञ डॉक्टरांनी विविध आजारांवरील तपासणी व उपचार केले. यामध्ये डॉ. अव्हैत पाटील, डॉ. गौरी बेडसे, डॉ. सोमनाथ चोले, डॉ. चिन्मय झुंजरे, डॉ. शनया दानीस, श्री. भिमाशंकर उंबरे, श्री. श्रीशैल्य गुंड, श्री. श्रीकृष्ण हंगे आदींचा सहभाग होता.

शिबिरात हृदयरोग, स्त्रीरोग, कान-नाक-घसा, नेत्ररोग, बालरोग आणि अस्थिरोग या विभागातील तपासण्या करण्यात आल्या तसेच सर्व रुग्णांना मोफत औषधोपचार देण्यात आले. यापैकी ७८ जणांना गंभीर आजार असल्याचे निदान झाले असून त्यांच्यावर पुढील उपचार मुंबईतील तज्ज्ञ डॉक्टरांच्या देखरेखीखाली करण्यात येणार आहेत.

शिबिर यशस्वी होण्यासाठी भाजप पदाधिकारी व कार्यकर्त्यांनी समन्वय साधत परिश्रम घेतले. ग्रामस्थांच्या चेहऱ्यावरील समाधानाचे हास्यच या शिबिराच्या यशाची खरी पावती ठरली.