वडाळे तलावावर दीड दिवस गणरायाचे विसर्जन भक्तिभावात – आमदार विक्रांत दादा पाटील यांची उपस्थिती

पनवेल : गणेशोत्सवातील दीड दिवस गणरायाच्या विसर्जनाचा सोहळा वडाळे तलावावर मोठ्या भक्तिभावात आणि उत्साहात पार पडला. सकाळपासूनच भाविकांचा मोठा जनसागर विसर्जनासाठी जमा झाला होता. ढोल-ताशांच्या निनादात, ‘गणपती बाप्पा मोरया’च्या गजरात, गुलालाच्या उधळणीत आणि टाळ-करतालांच्या नादात परिसर गणेशमय झाला होता.

या सोहळ्याला आमदार विक्रांत दादा पाटील यांनी उपस्थित राहून भाविकांना भेट दिली. त्यांनी नागरिकांशी मनमोकळा संवाद साधत त्यांच्या अडचणी, समस्या जाणून घेतल्या. “लोकांच्या प्रश्नांना सकारात्मक तोडगा काढण्यासाठी मी सदैव तत्पर आहे,” असे आश्वासन दादांनी यावेळी दिले. नागरिकांनीदेखील गणेशोत्सवात राबविलेल्या विविध सामाजिक उपक्रमांची माहिती आमदारांना दिली.

गणेशोत्सव हा समाजाला एकत्र आणणारा आणि ऐक्य दृढ करणारा सण असल्याचे सांगताना आमदार पाटील म्हणाले, “गणरायाच्या कृपेने प्रत्येकाच्या जीवनात सुख-समृद्धी, आरोग्य आणि समाधान लाभो हीच माझी प्रार्थना आहे.”

वडाळे तलाव परिसरात विसर्जनासाठी प्रशासन, पोलिस व स्वयंसेवकांनी उत्तम व्यवस्था केली होती. सुरक्षेची काटेकोर व्यवस्था, वाहतूक नियोजन, तसेच स्वयंसेवकांच्या मदतीमुळे संपूर्ण विसर्जन सोहळा कोणत्याही अडचणीविना शिस्तबद्ध आणि सुरळीतपणे संपन्न झाला.

गणपती विसर्जनाचे आयोजन पनवेल महानगरपालिका आणि रोटरी क्लब यांच्या वतीने करण्यात येते.

श्रद्धा, भक्ती आणि सामाजिक ऐक्य यांचा संगम असलेला हा सोहळा नागरिकांच्या मनात कायम स्मरणात राहील, असा विश्वास उपस्थितांनी व्यक्त केला.