मोफत बियाणे वाटपात कथित घोटाळा, लोहारा तालुक्याच्या शेतकऱ्यांना डावलल्याचा जगताप यांचा आरोप

धाराशिव : जिल्ह्यात शेतकऱ्यांसाठी अनुदानावर दिल्या जाणाऱ्या मोफत बियाणे वाटपात गंभीर अनियमितता झाल्याचा आरोप होत असून, लोहारा तालुक्यातील एकाही शेतकऱ्याचा लाभार्थी म्हणून समावेश न झाल्याची धक्कादायक बाब समोर आली आहे. या निर्णयामुळे तालुक्यातील शेतकरी संतप्त असून प्रशासनावर पक्षपातीपणाचे आरोप करण्यात येत आहेत.

कृषी विभागाच्या नियमानुसार ७४ किलो बियाणे प्रति हेक्टर दिले जाणे अपेक्षित असताना अनेक ठिकाणी केवळ ६६ किलो बियाणेच वितरित झाल्याचा आरोप शेती अभ्यासक अनिल जगताप यांनी केला. “हे केवळ साधे तांत्रिक अपघात नाही; संगनमताने झालेला प्रशासकीय हलगर्जीपणा आहे,” असे जगताप म्हणाले. त्यांनी जिल्हाधिकाऱ्यांकडे चौकशीची मागणी करत दोषींवर कठोर कारवाई करण्याचीही मागणी केली.

कृषी विभागाने दिलेल्या प्राथमिक स्पष्टीकरणानुसार, “लोहारा तालुक्याचा फार्मर आयडी तयार न झाल्यामुळे लाभार्थींची नोंद होऊ शकली नाही.” मात्र शेतकऱ्यांचा आरोप आहे की ही माहिती अर्धवट व दिशाभूल करणारी आहे. त्यांच्यानुसार, “कागदोपत्री त्रुटी दाखवून आम्हाला लाभापासून वंचित ठेवले जात आहे,” असा सवाल उपस्थित करण्यात येत आहे.

दरम्यान, लोहारा तालुक्यातील शेतकरी संघटनांनी संयुक्त निवेदनाद्वारे पुढील एक आठवड्यात समाधानकारक पावले न उचलल्यास धाराशिव जिल्हाधिकारी कार्यालयासमोर धरणे आंदोलन करण्याचा इशारा दिला आहे. “पेरणी सुरू होण्यापूर्वीच बियाणे मिळणे अत्यावश्यक आहे; अन्यथा आर्थिक नुकसान सोसावे लागेल,” असे शेतकरी सांगत आहेत.

जिल्हा प्रशासनाने अद्याप अधिकृत चौकशी आदेश दिलेला नसला, तरी सूत्रांनी दिलेल्या माहितीनुसार प्राथमिक अहवाल तयार करण्यासाठी कृषी विभागाला निर्देश देण्यात आले आहेत. दोष आढळल्यास संबंधित अधिकाऱ्यांवर प्रशासकीय कारवाई होईल, अशी माहिती मिळत आहे.

महत्त्वाचे मुद्दे —

• ७४ किलोऐवजी ६६ किलो बियाणे वाटपाची तक्रार

• लोहारा तालुक्यातील एकाही शेतकऱ्याला लाभ नाही

• शेतकऱ्यांचा आरोप : संगनमताने प्रशासकीय गुन्हेगारी

• आठवडाभरात तोडगा न निघाल्यास धरणे आंदोलनाचा इशारा