माळेगावचे सरपंचपद सर्वसाधारण असल्याने मोठी चुरस
सुधीर कोरे
जेवळी, जि. ( उस्मानाबाद ) : माळेगाव (ता. लोहारा) येथील ग्रामपंचायतीची पंचवार्षिक निवडणूक पार पडत आहे. यावेळी येथील सरपंचपद हे सर्वसाधारण असल्याने मोठी चुरस निर्माण झाली आहे. ही ग्रामपंचायत सात सदस्य असून यापूर्वीच एक सदस्य बिनविरोध निवडून आला आहे. आता सरपंचासह उर्वरित सहा सदस्यांसाठी येथे एकास एक असे दुरंगी लढत होत आहे.
जेवळी- लोहारा या मार्गावर वसलेल्या माळेगाव हे लोहारा तालुक्यातील जवळपास बाराशे लोकसंख्या असलेल्या गाव असून या गावचा बहुतांशी शिवार हे माळरानाचा आहे. या गावात गेल्या पस्तीस वर्षापासून प्रतिवर्षी गुढीपाडव्याला हरीनाम सप्ताहाचे आयोजित करण्यात येतो. या परिसरात या सप्ताहाच्या परंपरेला महत्त्व आहे. आता येथील ग्रामपंचायतीचे पंचवार्षिक निवडणूक पार पडत असून यासाठी रविवारी (ता १८) मतदान होत आहे. येथील सरपंच पद हे या वेळी सर्वसाधारण आहे. येथे बेन्नीतुरा विकास पर्व पॅनल विरुद्ध जिंदावली महाविकास आघाडी पॅनल मध्ये एकास एक असे सरळ लढत होत आहे. सरपंच पदासाठी जिंद्दावली ग्रामविकास पॅनलकडून विद्यमान उपसरपंच अण्णाराव माणिक एकंबे तर बेन्नीतुरा विकास पर्व पॅनलकडून वैभव अंबादास पवार या दोन उमेदवारात लढत होत आहे. ही ग्रामपंचायत सात सदस्यीय असून यावेळी सात सदस्या पैकी बेन्नीतुरा विकास पर्व पॅनलचे प्रभाग एकमधील सदस्य शाहूराज सुरवसे हे यापूर्वीच बिनविरोध निवडून आले आहेत. आता उर्वरित सहा सदस्यासाठी आकरा उमेदवार निवडणूकच्या रिंगणात आहेत. यात बेन्नीतुरा विकास पर्व पॅनल कडून सौ संगीता गर्जे, सौ राधिका गुंड, राहुल गर्जे, उषा जांभळे, सौ अश्विनी गुंड व रत्नदीप मुरमे तर जिंद्दावली महाविकास आघाडी पॅनलकडून सौ रेणुका गर्जे, रतन गुंड, सौ सुकुमारबाई जांभळे, सुनील गर्जे व सौ जिजाबाई एकंबे हे निवडणूकीच्या रिंगणात आहेत.
